USIT utviklar store administrative system for heile sektoren for forsking og utdanning i Noreg. Oppdraga omfattar system som støttar arbeidet med å ta opp studentar til universitet og høgskular, det studieadministrative systemet FS og det nasjonale forskingsdokumentasjonssystemet Cristin. USIT har i tillegg utviklingsoppdrag for universitetsmuséa.
Samordna opptak (SO)
Samordna opptak (SO) koordinerer opptak til grunnstudium ved 48 universitet og høgskular i Noreg. IT-tenestene deira omfattar mellom anna Nasjonal vitnemåldatabase med tilhøyrande system for å samle inn og kontrollere vitnemål frå vidaregåande skule, webtenester retta mot søkjarar og system som støttar saksbehandlinga. Systemutviklinga skjer på USIT i Gruppe for samordna opptak i Seksjon for utvikling av administrative fellessystem (SUAF). Gruppa utviklar tenestene i samråd med sekretariatet til Samordna opptak. USIT har også driftsavtale med Samordna opptak, og driftar alle systema og tenestene deira.
Felles studentsystem (FS)
Det studieadministrative systemet Felles studentsystem (FS) er utvikla i Gruppe for felles studentsystem i Seksjon for utvikling av administrative fellessystem (SUAF). Tenester i FS er mellom anna FS-klient, FS-database, StudentWeb, SøknadsWeb, EvuWeb, FagpersonWeb og Ledelsesinformasjon. FS er nærmast det einaste studieadministrative systemet i Noreg for universiteta og dei statlege høgskulane, og blir også brukt av nokre private høgskular. USIT har i tillegg ansvar for sekretariat for Samarbeidstiltaket FS.
Forskingsinformasjonsystemet Cristin
Cristin (Current research information system in Norway) er eit forskingsinformasjonssystem for helsesektoren, instituttsektoren og universitet- og høgskulesektoren. Systemet er eit verkty for forskarar og forskingsmiljø i Noreg for å registrere og profilere publikasjonsdata, prosjekt, einingar og kompetanseprofilar. Forskningsmiljøa nyttar også Cristin til å rapportere inn publikasjonspoeng. Systemet Cristin er utvikla i Gruppe for fellesutvikla system i Seksjon for utvikling av administrative fellessystem (SUAF) . Organisasjonen Cristin er også tilknytt USIT.
Felles samlingsdatabaser for universitetsmuséa
USIT har eit omfattande utviklingsoppdrag for Universitetsmuseenes IT-organisasjon (MUSIT). USIT har ansvar for sekretariatet deira og driftar, utviklar og tilgjengeleggjer dei felles samlingsdatabasane. Arbeidet skjer i Gruppe for digital samlingsforvaltning i Seksjon for utdannings- og forskningsstøtte (SUF). MUSIT er ei permanent verksemd med eit nasjonalt ansvar. Du kan sjå universitetsmuséa sine samlingar på nett på portalen www.unimus.no.